6at beaivvi Guovvamánus ávvudeimmet sámi álbmotbeaivvi. Jagis jahkái ávvudeapmi oidnu eanet servodagas ja erenomážit medias miehtá davviriikkaid.
Muhto media buvttadeamis ja válljen vejolašvuođain lea stuora earru riikaid gaskan. Ii dušše álbmotbeaivvi oktavuođas muhto miehtá jagi.
Norgga beal sámis, Nrk sápmi ja maid privahta redakšuvnnat fállet stuorimus válljen vejolašvuođaid radio prográmmain ja alla kvalitativas tv buvttain, bargit leat eanet ja bálkkát buoret. Suomabeal sámi vas ii báljo gávdnu sáme-buvttaduvvon media earet ođas áššit ja radio.
Váilevašvuođat sámi medias ruoŧabeal sámi lea guhká leamašan áigeguovdil ja lea unohaš nu konkrehtalaččat vásihit earu leahkit Sápmelaš nubbebeal riikaráji.
Otná filbma ja prográmma-rievttit dávja estet geahččiid riikka olggubealde váldit oasi dain. Programma rivttiid dihte leat maid olu árvvolaš buvttat arkivain main álbmot ii oačču váldit oasi. Dát gáržu sáme servodaga dásseárvvu, gielalaš ovdaneami ja vejolašvuođa váldit oasi oktasaš vásahusain ja muitalusain.
Sámi media lea divrasit buvttadit dulkon ja jorgalan-goluid dihte, ja dat ágga hehtte sámemedia buvtadeami eanas redakšuvnnain. Vejolašvuohta gullat ja lohkat sámegiela medias stivrejuvvo redakšuvnnaid dahttus buvttadit sámi media. Ekonomalaš ákkat maht estet media gokčat vissis oasiid servodagas, lea duođalaš demokrahtalaš vearredahku.
Sámiid Riikkabellodat meidne ahte redakšuvnnat galggašivččet movttiduvvot bálkadit sámi gelbbolašvuođa nu ahte buvttat vástidit sámi servodaga dárbbuide.
Sámiid Riikkabellodat evttoha Sámediggai bargat dan ovdii:
– ahte sámi mediabuvttain sáhttá váldit oasi visuin riikkain mat leat koloniseren Sámi.
– ahte sámi media buvttadeaddjit ožžot eanet ruđaid sámi bargiide, buvttaide ja sámegiela geavaheapmai.
-ahte public service oastá rivtiid eanet sámi buvttaide.
-ahte sámi álbmoga vejolašvuohta váldit oasi arkiverejuvvon buvttain nannejuvvo
-ahte sámi media oačču buorit vejolašvuođaid ovttasbargat ja ráhkadit oktasaš media sisdoalu ja tv buvttaid.
Saemiejrijhken Krierrie.
Káren-Ann Hurri